Jude

YUDE Yude 'ina lele

Yude 'ina leta bewa 'ileleya 'abehega tohe'ita 'abo'abo tasanapudi ma taguipailedi.

Yauwedo

1 Taugu Yude, Yesu Keliso 'ina topaihowa, Yemesa tauna tasigu. Bewa 'imi leta yaleleyawa, 'omi Tamadai Yehoba 'ana hesihesinuwao, weyahina 'ihelauwegomiya ma Yesu Keliso 'i'ita'ita yahigomi. 2 Yehobaina 'ina 'atemuyamuya ta 'ina yaliyaya ta 'ina helau 'oimiya 'ihemadou.

Tohe'ita 'abo'abowao

3 Ciyagwao, nuwanuwagu ma 'ada 'abihetenaina weyahina yaleleyawa, ma hesi geya sawasawahina, weyahina 'aigeda mwau 'ihapwesa pwaiya 'oimiya, 'oinega 'ilobwaineya ma leta bewa 'oinega yalohatotogomi ma 'abehega geya'abwa 'ida tapwalolo dumwadumwaluna walologwahate, ma hesi wahetapewa weyahina.

Weyahina 'ida tapwaloloina tauda Yehoba 'ana tohemisao 'i'ebwae pwaigita.

4 Mwauina 'ihapwesa pwaiya 'oimiya, beno tupwadi togala si'abowegomiya ma 'imi boda 'oina siluguwa, 'oinega Yehoba 'ina helau 'oida taudi 'idi he'itega sibuiya ma ganawala, ma wete 'ida Yehoba ma Bada Yesu Keliso silogwahatediya. Taudi 'idi galao weyahidi 'adi loina mwauna mwalohene Yehoba 'ina buki 'oina silele pwaiya.

5 Sanapu 'aigeda yahegwae hilegomi, weyahina mwalo wanuwa sabwalena, 'oinega wada nuwatuhuyahi, beno mwalohene Yehoba 'ina bodao 'i'abihetediya eeta sihapwesa tupwa Itipita 'oinega, ma muliyetega Yehobaina tupwadi 'ihunudiya, taudi geya sihemihemisa.

6 Aneloseyao wete wanuwatuhu yahidi, weyahina mwalo tupwadi taudimo si'abi hanehediya, ma 'idi 'ebemiya si'ebesinediya, 'oinega Yehoba 'ipai momosidiya eeta tupwa guguyou ni'uwa 'oina 'ilagudiya, ma nobwa 'abwa simiyamiya 'ana siga bwa'omatana 'ana sabwelo 'ihapwesa.

7 Taudi 'idi mumuga gidemusa tupwadi 'asa mwalohene, beno Sodoma* ma Gomola* ma tupwadi 'asa deidiya, weyahina pui 'ana nuwa'ewa madouna 'oinega sipaipaihowa besobeso ma 'idi 'eheloheloheyao mahetediyao sipuipui, 'oinega Yehoba 'igabudi 'aiwe 'ala'alata hatayana 'oina. Ta he'itaina bewa mabwaiyada weyahida.

8 Ma togalaedi silugu pwaiya 'oimiya, 'idi mumuga mahemahetena, weyahina taudi 'idi nihiyao 'oidiyega siloina galana, eeta 'idi galao 'etoi sipaipaihowadi, 'aigeda wahidi sigihe bailidi, heluwena toloinao bwebwe'adi silogwahatediya, ma hetoina tomiya galewa bwebwe'adi si'ahwa galagalaedi. 9 Ma aneloseyao 'idi tohanugeta Maikeli mwalohene 'ihe'ahupanapanawa Seitani 'oina, Mosese wahina weyahina, ma Maikeliina geya Seitani 'i'asone, ma hesi tuwa 'igwaeya, “Bada 'i'ausigo.”

10 Ma togalaedi, 'eguma to'aha geya sisanapu, ma tuwa si'ahwa galagalaedi, weyahina taudi gide hebahebai totopwatula, ta 'adi lotohona siloiloinaedi, ma 'oinega siboidimo si'abi'abi hegalaedi. 11 Nuwa'ole'oledi weyahina Keni* 'ina 'eda galana 'oinega sitautauya, ma 'oinega 'idi wasawasa weyahina simumuga galana, gidemusa wete Balami* mwalo mumugana. Coinega sihesilae, weyahina loina bwebwe'ana silogwahateya, mwalo gidemusa Kola* tauna loina 'ilogwahateya.

12 Ceguma tapwalolo 'oina helau 'e'ahaina wapaipaihowa ma 'eguma togalaidi siluguwa, 'e'ahaiina si'abihegala, weyahina si'ai hedahedada ma geya sida deba mwadina. Nuwanuwadi taudimo siyaliyaya, 'adi 'ita gide yaloha dubana yaumai 'ipeineya ma geya dohi. Wete 'adi 'ita gide 'aiwe, 'ina sauga huwa ma geya huwainamo, 'oinega sigoha yahule ma 'i'amasa moisa. 13 Ma wete 'adi 'ita gide bagodu madoudi ma gwalobusobusodi 'idi paihowao 'ebe deba mwadina. Wete 'adi 'ita gide 'ipwalao siyawala besobeso galewa, 'oinega guguyou 'ina tupwa simiya hataya.

14 Mwalohene Inoke togalaedi weyahidi 'iloguguya, ma Inokeina 'eguma yasoyao tahasilidi Adama 'oinega ma 'itauya yaso sikisi sigumwala, ma yaso hesebenina beno Inoke 'ina yaso. Eeta Inokeina 'ina loguguya 'oina 'igwaeya,

“Wa'ita! Bada 'ina aneloseyao 'asi'asilalaidi ma mabwaiyadi mahetenao sinaonaoma, 15 ma 'abehega tomota mabwaiyadi 'iloinaedi ma 'ibwa'omatadi, 'idi mumuga baibaiwadi ma galadi weyahidi, ma wete 'idi 'ahwa galao mabwaiyana 'oina weyahina.”
16 Tomotaedi tolomugi ma tosinala, ma taudi 'adi lotohona 'oinega sitautauya. Wete togwaehanehane, ma 'eguma 'iyadiyao 'oidiya sigwae helau, beno tobwatobwa weyahina.

Wa'ita yahigomi

17 Ciyagwao, 'ida Bada Yesu Keliso 'ana tohepwailao 'idi gwae hemisa wanuwatuhuyahi tutaina mwalo sigwaeya, sigwae,

“Tuta 'ana 'ebelosaloha 'oina tupwadi tomota nata mumuga dumwadumwaluna silotuyane, weyahina taudi 'adi lotohona galana 'iloiloinedi.”
19 Togalaedi mumuga bale'u simulimuliye, 'oinega tohekalesiyao 'adi towatahao, weyahina Yaluyaluwa Tabuna geya 'oidiya.

20 Ciyagwao, 'ilobwainegomiya ma tapwalolo dumwaluna wa'abiyahi momosi ma 'oinega wagihe pa'aligomi, ma wete Yaluyaluwa Tabuna 'ina waiwaiyega wa'ahwanoi Yehoba 'oina, 21 ma wete helauina Yehoba 'oinega wa'abiyahi, ma wayamwayamwana tolahisa 'abwa 'ida Bada Yesu Keliso 'ina 'atemuyemuyega yawasimi miyamiya hatayana 'i'ebwaegomi.

22 Ma tupwadi 'iyadao geya sihemihemisa moisa, watoho ma wagihenuwa sabwalenidi. 23 Tupwadi wete 'asa 'ala'alata deina simiyamiya, watoho ma wa'abihetedi. Tupwadi wete togalagala wa'atemuyamuyaedi ma walemedi, ma 'idi mumuga wamataute, eema mumuga bale'u 'ana tobwatobwao walogwahatedi.

Gwae helau

24 Yehobaina sawasawahina 'ilomata yahigomi ma geya'abwa wabe'ube'u ee 'ana siga tutaina tauna matana 'inaolegomi 'ina 'asa 'asi'asilalaina 'oina, ma'imi mumuga bwebwe'ana, ma wete ma'imi yaliyaya madouna. 25 Yehoba taunamo 'ada To'abihetena. Cabihetenaina 'ipaihoweya 'ida Bada Yesu Keliso 'ina paihowega. Coinega tahepwatuwe 'ina loina dumwadumwaluna ma waiwaina mwalohene ta nige ma tuta sinaonaoma 'oidiya. Emeni.

Taugu Yude.